台灣八天遊(一)

2013.3.30  寧夏夜市

下午16:45乘搭國泰航班，大約六點就辦妥入境手續，喺桃園機場搭車出市中心。

入到市中心已經七點幾，辦妥check in手續，入房放低行李就去附近嘅寧夏夜市逛逛。先去「鬍鬚張」食滷肉飯，用五花肉塊製成嘅小肉粒鋪喺飯面，好香，不過D小肉粒全係肥肉碎，覺得好似食咗好多豬油落肚咁。之後又試咗豬潤湯，唔錯。

2013.3.31  北投&金山老街

行程嘅第一站係北投溫泉博物館，裏面嘅間隔非常日式，大概因為曾被日本佔領嘅緣故吧。參觀完就試吓北投嘅名物──溫泉拉麵。

Lunch後就參觀北投文物館，裏面嘅間隔同樣非常日式。

下一站就係陽明山有名嘅龍鳳谷。

睇完龍鳳谷就到金山老街逛逛，呢道有好多雜貨店舖，好似九份咁。

逛完金山老街就返市中心食晚飯，本來打算去鼎泰豐食小籠包，不過鼎泰豐真係太多人喇，於是我哋去咗幫襯永康街嘅「高記」，除咗小籠包之外，仲有生煎包，味道唔錯，特別係佢哋嘅醉雞，好香酒味，但係唔會有酒嘅辛辣感覺，非常正。