關島三天遊

2013.7.17  關島之旅


今次無啦啦經東京出發去關島，十下十下咁過咗三日。點解會去？因為有免費機票&住宿，所以咪去玩吓囉。

唔駛錢嘅嘢梗係無乜jetso，關島嘅行程本來係7月17日至7月20日，出發時間係夜晚九點幾，回程時間係朝早六點幾，話就話四日，實際只係得兩日玩，來回七個鐘頭機咁樣玩兩日，真係嘥鬼氣。點知17號晚七點去到機場，UA居然話架機故障，仲喺關島，因此航班要cancel，我哋要改搭18號嘅加班機，咁即係話關島之行就只剩番一日半啦，真無謂！

我搭過UA嘅航班三次，從來無一次能夠準時起飛，由呢日開始，我決定以後唔會俾錢買UA嘅機票。無得飛，呢晚就只好入住UA安排嘅機場日航酒店，包埋自助晚餐。

 
喺機場無無聊聊過咗一晚，第二朝話10:30飛，唔知為乜都要搞到11點幾先起飛。

上機時天昏地暗，真係出師不利囉！

不過個機師又揸得好定，雖然遲咗飛，但係都能夠喺原定嘅時間降落，真係好掂喎！

落咗機，過埋關，等埋酒店架車，入到酒店已經四點幾。

 

房裏面個bathroom比日本嘅business hotel房大，而且幾靚。

間房當然都好大啦！

露台望出去個view好正。

D茶具都幾靚。

放低行李，搞吓搞吓就五點幾，出市中心要一個鐘，行得嚟都天黑啦，人生路不熟，無謂出去囉，喺酒店逛吓就算。

 

間小型教堂都好靚。

 

呢間resort經常有日本運動員嚟集訓，當中有奧運游泳選手。

 

呢D都係棒球巨星嘅簽名。

店裏面有好多嘢賣，有平有貴，有D都幾靚幾得意架。

 

 

2013.7.19  關島市中心

7月19日朝早喺酒店做咗個SPA，跟住就搭酒店提供嘅免費巴士出市中心行吓。

呢日天氣幾好，不過街上嘅遊客唔多。其實關島遊淨係得呢一日，唉……

 

 

好多遊客都會搭呢種市內巴士。

行咗一陣，我哋幫襯FRIDAY食LUNCH，味道一般。每人差不多要50蚊美金，貴！

食飽就周圍逛吓睇吓，買咗啲啲手信。

D朋友話呢款CHOCOLATE好出名，我個人覺得都唔係咁好食啫。

行到大約五點我哋就返酒店食海鮮自助晚餐，每位35蚊美金。

呢餐唔錯，食得好飽，紅酒、香檳、啤酒……飲み放題。

大約八點就返房瞓覺，點解？因為第二日早機走，酒店提我哋四點幾到大堂集合，安排專車送我哋去機場。

7月20日朝早三點幾起身，眼矇矇拎住行李落LOBBY。

仲有D時間，影住相等。

去到機場天都未光，但係個food court都有咁多人。

 

呢道就係免稅店喇。

 
無無謂謂嘅關島遊咁就完咗喇，幸好最後個飛機早餐都幾好食。